Mwen gen yon ti parabòl pou esplike jan m wè sitiyasyon n ap viv aktyèlman. Gen yon machin. Gen yon chofè k ap kondui l epi gen pasajè nan machin nan. Se chofè ak pasajè ki deside kote machin nan prale epi ak ki vitès. Machin nan gen pyès, li gen gaz. Lè chofè a vire volan, machin nan vire. Lè chofè a vle ale pi vit, li bay plis gaz. Si machin nan tonbe anpàn, se yon mekanisyen ki pou ranje l. Si yon pyès kase, yo ranplase l ak yon nouvo pyès pou machin nan ka itil chofè a ak pasajè yo ankò.

Nan sosyete nou an, plizoumwen, gwoup moun fonksyone tankou egzanp mwen sòt bay la. Lidè ak moun reponsab yo se chofè ak pasajè yo. Pyès machin yo ki ansanm se machin nan, reprezante moun ki anba lidè ak responsab yo. Kit se yon saldeklas, kit se yon òganizasyon debaz, yon legliz, yon ONG, yon antrepriz, yon gouvènman, plizoumwen li tankou yon machin: lidè ak responsab yo sèvi ak moun ki pi ba yo.

Nou pa bezwen yo gwo entèlektyèl pou fè nou konnen ; youn (1), moun--imanite--pa pyès machin, de (2), sistèm mwen esplike anwo a pa fè sosyete a rive lwen. Gade sityasyon ni nan peyi dAyiti, ni nan lemonn. N ap jwenn konfli toupatou. Souvan, gen fayit terib nan lidèship lan. Epitou, nou wè souvan moun pito fonksyone tankou pyès machin. Olye nou wè tèt nou responsab pou pwòp pati pa nou nan evolisyon gwoup nou ak sosyete nou, nou pito pa pran gwo responsabilite.

Nòmalman, nan sosyete nou, lè yon moun gen pouvwa sou lòt, tandans nou se pou domine lòt. Se pou di l sa pou l fè ak sa pou l pa fè. Pi souvan, ak sistèm dominasyon sa a, manke respè, yonn pou lòt. Epi, lè gen yon mank respè, bagay pa bon. Pral genyen pwoblèm kanmenm. Li kapab nan kout tèm swa long tèm men, lè yonn pa respekte lòt, pral gen difikilte. Listwa aprann nou sa.

Metòd Espas Ouvri ak Wonn Refleksyon, ban nou yon lòt fason pou fonksyone nan yon gwoup. Olyè se moun ki pyès machin epi se lidè ki chofè swa mekanisyen, nou vin pi sanble ak yon jaden. Lè moun responsab la kiltive byen, plant yo kapab sou chemen pou donnen byen. Lè plant yo jwenn lapli, solèy, bon tè ak sa yo bezwen, chak plant nan jaden an pouse epi flèri. Se pa kiltivatè ki fè plant yo pouse. Se kiltivatè ki ede kreye yon anviwònman ki bon pou plant yo. Kidonk, plant yo donnen, granmèsi Bondye.

Yon gwoup moun se yon sistèm vivan. Evolisyon moun ladan l se responsabilite li menm ak Bondye. Lidè ak responsab yo kapab ede fasilite yon anbyans ki favorize sa, men, finalman se moun nan ak Bondye ki responsab pou l devlope lespri l. Depi yon lidè kreye yon anviwònman ki bon pou moun epanouyi, sa pral rive natirèlman menmjan avèk plant nan yon jaden. Epi ansanm, gwoup la pral evolye. Li pral vin pi kapab nan jere sitiyasyon ki plizanpli konplèks. Se sa nou bezwen jounen jodi a : ogmante kapasite nou pou n jere yon monn k ap vin pi konplèks chak jou.

Avèk Espas Ouvri ak Wonn Refleksyon, n ap rann li posib pou moun viv yon lòt kalite lidèchip ak dinamik nan gwoup. N ap kreye yon anviwònman kote moun ka reflechi ansanm epi kominike lib e libè yonn ak lòt. Nan anviwònman sa a, moun pral aprann kòman pou pran plis responsabilite pou desten yo. Epi, fòk lidè ak responsab yo (pwofesè, direktè, chèf, prezidan…) plis wè tèt yo kòm kiltivatè nan yon jaden, pa yon chofè machin. Zouti ki pral ede yo pi plis se aprann koute lòt epi kòman pou kreye espas ak anviwònman ki favorize plis dyalòg ak respè nan mitan tout moun k ap kolabore ansanm.

Espas Ouvri se yon filozofi, yon pwatik, yon pwosesis ki fè l posib pou nenpòt gwoup, piti oswa gwo, pou oto-òganize (vin ansanm epi jere tèt yo) nan yon fason efikas pou abòde epi akonpli travay ki enpòtan epi ki kapab trè konplèks.

Wonn Refleksyon se yon estrateji pou nouri edikasyon ki chita sou baz diskisyon nan tout kalite klas lekòl ak gwoup. Atravè lekti ak diskisyon ki fèt sou yon seri tèks ki byen chwazi, etidyan/patisipan yo devlope abilite nan konprann sa yo li, panse kritik, dialog, ak animasyon gwoup.